【長爆Data有得救？】WhatsApp 或增 Low Data Usage 功能

自 WhatsApp 加入 Voice Message 及打電話功能後，不少人的數據個個月都打爆，一嚟方便，Message 太長就索性用口講覺得快過打字（當然亦有人當係對講機咁拎住係咁講不亦樂乎）。二嚟 WhatsApp Call 更係 Data 陷阱，事關你以往想打俾呀細 B，可能係 WhatsApp 一搵佢個名，篤一篤佢個電話就會 Call 到佢，但依家就預設變成 WhatsApp Call，唔為意的話好容易用多咗 Data 都唔知。

有網民指，WhatsApp 在最新的 v2.12.5 iOS Beta 版本中，加入「Low Data Usage」功能，主要針對減低 WhatsApp Call 的數據流量。據指，新版本的功能描述中列明：「啟用此功能有助於使用 VoIP 通話時，減低網絡或 Wi-Fi 數據用量。不過，所謂 Beta 版只在網上流傳，官網上的 iOS App 仍然只維持 v2.12.4 版本，未知到正式推出時新功能有冇得留低呢？ 

記者實試將 10 秒的 Voice Message 內容轉用語音輸入法再 Send一次，只需約 1-2 秒就準確轉換整段內容，而且中英皆可。	於對話設定內，取消於使用手機網絡數據時自動下載多媒體，就可以避免耗用大量流動數據下載相片、影片及聲音檔。

Voice Message 食數據？語音輸入快靚正
題外話，要 WhatsApp 慳 Data，其實唔一定要「加個功能」先做得到，你都做得到架！以 Voice Message 為例，Send 一句約 10 秒的 Voice Message，已經需要約 41KB 的數據。相反，使用手機內置的語音輸入法（iOS 為 Dictation），即 Keyboard 上的咪高峰 Icon，而非 WhatsApp Message 對話框旁果個。

閣下同樣只需對住手機講野，毋需打字，就可以將內容自動變成文字訊息；經測試後同樣 10 秒的內容，只需 225byte 數據量，連 1KB 也不到！既慳到 Data，又有齊 Voice Message 嘅優點，仲唔怕對方投訴唔方便聽錄音，一舉三得，It seems like fun！編輯部測試過，不論 Android 定 iPhone，Voice To Text 都算準確，就算講得快少少，只要唔係 Rap 住去嘅速度，都一樣 Detect 得到。

此外，閣下亦可以在「設定」＞「對話設定」中，將「自動下載多媒體」選項，設置為只於  Wi-Fi 連接才自動下載，手機數據可全部取消，咁就可以自己話事下載邊啲相同影片，慳返啲數據啦！最後仲要提提大家，雙方同樣在香港時，經手機聯絡人打「真電話」俾佢，而非 WhatsApp Call，一般嚟講通話質素較穩定，又節省數據量，最緊要幫對方慳數據流量丫嘛～

圖片來源：techpp.com