快餐店外賣大家都食得多，平時就話多數送吓乜醬物醬、玩具、意粉薯蓉以至折扣優惠之類咁，特別啲可能好似之前 Pizza Hut 外賣盒變投映機，或者麥記開心樂園餐送 VR 裝置；除此之外仲有咩新意思吸引客人呢？最近印度 KFC 就諗到個非常實用嘅「贈品」：充電器。
[ot-video][/ot-video]
印度 KFC 最近推出一款名為「Watt a Box」的五合一盒裝套餐，包括漢堡和炸雞等招牌食品，最特別嘅係外賣盒包裝旁邊裝上可拆式 6,100mAh 流動電池，附設 USB 接口，以及 microUSB 和 Lightning 充電線，充 iPhone 或 Android 都得。不過，有嚿尿袋係咪就等於充到電呢？外媒 BGR 試用 iPhone 5s 實測，充電半個小時後，只充電 17%，效能麻麻；重新充滿尿袋並改用紅米 Note 3 再試，充到尿袋乾都只係充到 7%。
不過話說回來，想得到呢款特別版外賣盒都唔係咁容易架，要喺印度德里或孟買 KFC 分店舉行嘅比賽中勝出，或網上比賽中勝出，先有機會獲得特別版「Watt a Box」。無論如何，將尿袋結合外賣盒嘅概念確係有創意我鍾意，幾時有外賣盒連 Wi-Fi 呀喂？
