更多

    【倫敦直擊】果粉潮聖新地標 Apple 新總壇 @巴特西發電廠

    Alan Ng
    Alan Ng
    《PCM》副總編輯 @Plug Media

    果粉好鍾意去到各地嘅 Apple Store 潮聖打卡,以後去倫敦又多一個潮聖景點,不過今次要介紹嘅並唔係 Apple Store,而係 Apple 響今年 2023 年 3 月 6 日正式入伙,位於 Battersea Power Station 巴特西發電廠嘅全新英國總壇。

    Apple 於 2016 年正式拍板,落實倫敦新總壇將會搬到 Battersea Power Station,原本預計 2021 年正式進駐,可惜因為疫情等各種原因延至 2023 年才成事;Apple 新總部位於 Nine Elms 九榆樹區 Thames River 泰晤士河南岸旁邊,由一個荒癈 30 多年嘅 Battersea Power Station 發電廠重新開發而成,重啟工程則於 2012 年展開,空置期間亦有多套電影響度取景,包括 2011 年上映、獲多個奧斯卡獎項嘅《The King’s Speech》。

    十年時間重新開發

    說返發電廠本身,經過十年嘅漫長工程,位於發電廠嘅購物中心,早於 2022 年 10 月 14 日率先開幕,入面有過百間店鋪,除咗各個潮流品牌、名牌,又有兩層嘅日本便服店 Uniqlo,亦有 Nike、Adidas、Polestar 電動車、Tag Heuer、Under Armour 等等,據知 Lego 專門店亦會於稍後時間登場,一家大細都啱行。

    RE.UNIQLO Studio 提供即場修補衫褲服務

    值得一提係呢度間 Uniqlo 有個 RE.UNIQLO Studio,會有專人響度即場修補衣物,攞嚟修補嘅衫、褲當然係要響 Uniqlo 買嘅先得啦,包括外套、牛仔褲、毛衫、恤衫等,而修補嘅項目包括穿窿、拉鏈、鈕扣等,收費方面由最基本嘅 £5 起,例如有件好鍾意嘅 Uniqlo 牛仔褲著個褲袋穿咗個窿又拉唔到拉鏈,但又唔捨得唔要,咁就可以攞嚟呢度比佢哋幫手補返,每補一個樣嘢計一次錢,即係話如果條褲有一個窿加一條拉鏈要修補,就要計兩次錢,埋單即係收 £10 喇。

    除咗修補之外,大家又可以件衫嚟依個人喜好作定製,變成一件獨一無二嘅衫或褲,另外,如有一啲唔再著嘅衫,都可以攞嚟呢度回收再捐比有需要嘅人,或用嚟作 recycle 用途亦得,總之呢個服務最大目的就係將啲衣物嘅壽命延長,減少浪費。

    而有 RE.UNIQLO Studio 服務嘅 Uniqlo 全英國只有四間,除咗 Battersea Power Station 外,另三間都係響倫敦嘅,分別係 Regent Street、Wandsworth 同埋 Convent Garden,有興趣嘅話可以去試吓㗎!

    煙囪變升降觀景台

    為咗吸引更多遊客,發電廠特設 Lift 109 觀光景點,Life 109 係將四支煙囪嘅其中一支,亦係最接近 Thames River 嘅一支改建,響煙囪入面裝咗一個圓形全玻璃嘅升降機,將遊客升上煙囪最頂位置,以 360° 觀賞倫敦景色,日後有機會再作介紹。

    Apple 辦公室佔六層樓

    Apple 位於 Power Station 嘅新總壇共佔六層樓,面積達 46,000 平方米,佔辦公室整體樓層約 40%,新總壇由一間著名嘅英國建築工程設計公司 Foster + Partners 所設計,於設計內部嘅工作空間時,首要條件係要比各員工能作最大程度嘅交流、協作;據知 Apple 英國很多分部已陸續搬進新總壇,令整體運作得以更集中。

    筆者早前就出省城落倫敦,當然要順便去潮聖一下,睇吓可唔可以近距離望吓 Apple 新總壇係點樣,其實舊年 12 月時都去過一次,當時由於辦公室仲係最後趕工階段,所以大堂係圍晒板,乜都睇唔到,今次就唔同喇,已經入咗伙,可以睇到入面大槪係點。

    大堂前成打卡位

    如果搭 Tube 去嘅話,一出 Battersea Power Station 地鐵站轉個彎行一陣就到發電站商場入口,響呢度入去就會見電梯大堂,以兩層樓高嘅落地玻璃包圍,入口響一樓嘅低層大堂兩側,左右各一個出入口,不過現時只見右邊門口運作,打開門後就需要先拍卡,拍卡確認後第二度玻璃門先會打開正式進入低層大堂,有需要可以響低層大堂嘅休閒空間坐吓,要再上辦公室就要搭𨋢上高層大堂。

    而筆者亦要響呢度止步,因為呢度保安深嚴,唔係隨便入得去,於是同保安傾咗兩句,佢話 Apple 辦公室係已經開始運作,不過就唔肯透露係邊幾層樓,亦唔肯再答我問題,甚至我問佢可唔可以入去影少少低層大堂相都被拒絕,咁都啱嘅,話晒都係 Apple 新總部,無理由咁易比閒雜人等入到去嘅,所以大家嚟到潮聖都係響兩層落地玻璃前面打個卡就算喇。

    大家要去 Apple 新總壇潮聖兼 shopping 嘅話,最方便就係搭 Tube 嘅黑色線 Northern Line,其中一個分線終站就係 Battersea Power Station,一出站行大約 5 分鐘就到。

    Battersea Power Station 網址:https://batterseapowerstation.co.uk/

    您會感興趣的內容

    相關文章