當一班親朋戚友聚首一堂，除咗打機、打牌之外，其實玩 board game（桌上遊戲）都係一個幾好嘅娛樂，可以 kill time，又可以增進感情，筆者近年多數同一班大小朋友玩《狼人殺》，今年就多咗一個 board game 玩，就係由益智網頁遊戲演變而嚟嘅《Wordle》喇。
你無睇錯，我無寫錯，真係 board game 版嘅《Worlde》嚟呀！同筆者一樣，相信好多人每日都玩緊《Wordle》網頁小遊戲，響2021年尾推出後，好快就瘋摩萬千網民，筆者嘅社交平台每有都有唔少朋友分享佢哋每日《Wordle》嘅成績，可見《Wordle》仍然好受歡迎。
《Wordle》係乜？點玩？
如果未玩過或未聽過《Wordle》係乜嘅話，唔緊要，響度簡單講吓《Wordle》點玩先。《Wordle》玩法好簡單，只要響六次機會入面，估中內含五個字母嘅英文單字就過關，而每日都會有一個唔同嘅英文字比你去估，查實每日花少少時間可以動吓腦筋，又可以學吓英文生字，真係一舉兩得㗎！
呢款《Wordle》係官方出嘅 board game 版，響 2022 年 10 月尾推出，不過香港代理未見引入，而筆者響外國嘅 Game shop 見到，有玩開網頁版嘅筆者當然即刻買嚟試試啦，響英國賣緊 £19.99，而最平係美國 Amazon，賣緊 US$20，要留意係未計運費。
桌遊版道具、玩法介紹
跟網頁版玩法一樣，不過就轉晒做實體，遊戲內有幾款道具，分主持及玩家兩邊使用，首先主持方面有塊答案硬卡板，同埋黃、綠兩色提示透明膠片，而玩家方面就有三塊估字硬卡板同埋遮擋卡，另仲有可抹嘅黑色水筆用嚟寫答案。
開始前主持響答案板上先寫低答案同埋玩家資料，玩家就用遮擋卡掩護自己嘅答案卡，遊戲就可以開始，玩家只要響自己張估字板寫低答案估字，完成後就比主持檢查答案，呢個時候，主持就要出動黃色或綠色膠片，如果答案有中嘅字但唔啱位置嘅話，就用黃色膠片放響個字上面，如果答案係中字中埋位置就用綠色膠片，兩種都唔係嘅就代表答案係無呢個字喇！當檢查完所有玩家嘅答案，若果有人估中（即全部綠色膠片）就勝出，否則就繼續下一回合。
玩家就要憑呢啲提示繼續去估，有黃色嘅字就要調位，綠色嘅字就保留原位，然後再組合其他字母去估，而機會只有六次，當有玩家得到五塊綠色膠片，就代表估中答案勝出，若六個回合都無人估中就可以跟規則開估，筆者就會比大家繼續直至估中為止。遊戲中，主持可以比提示呢個字係關於啲乜？例如係同動物、食物有關之類嘅提示，以降低難易度。
答案提示圖解
小結
估字遊戲一向都好受歡迎，由傳統嘅《填字Crossword》到《數獨Sudoku》，到今次嘅《Wordle》，雖然玩法如一，但勝在千變萬化，有時可以好易，但有時又可以好難，所以先有咁多人鍾意玩同挑戰。
而《Wordle》嘅玩法其實有啲似《Master Mind》，憑提示再估落去，不過估字嘅難度再高啲，一來機會只得六次，加上要真有其字先得，唔似網頁版咁可以亂撞去試；但 board game 可以同時多人一齊估，唔似網頁版只能自私玩，咁當然就熱鬧得多，總之各有各優劣。而且除咗網頁版、board game 版，《Wordle》仲有實體書版本，相信呢股《Wordle》熱潮會繼續延續落去。
《Wordle》美國 Amazon 官方銷售網頁：
https://www.amazon.co.uk/Hasbro-Gaming-Players-Inspired-Multicolor/dp/B0BD9BPC59/ref=sr_1_3?keywords=wordle+game&qid=1674038904&sr=8-3
