喺寫感受之前，等細佬講下咩係穿戴式喇叭先，廢事俾人話我盲撐或者盲反啦。其實穿戴式喇叭嘅原理同一般藍牙喇叭無乜分別，好耐以前已經有「穿戴」嘅概念，不過以前所謂嘅「穿戴」只係一個細喇叭加個夾，直到上年終於有廠推出真。穿戴式喇叭。真．穿戴式喇叭即係以 U 形、符合緊貼頸部嘅人體工學設計，因為係掛頸，啲聲近咗、唔使開好大聲，同時又避免咗長時間戴耳機嘅唔舒服。
今次細佬試玩嘅係 My Theater 嘅穿戴式藍牙揚聲器，講下啲好嘢先啦，始終係掛頸嘅，重量係好重要嘅一環，咁佢真係好輕，得 88g， 掛住同無掛無乜分別。另外，佢好貼心咁包埋一個 USB 接收器，令到佢幾乎可以支援所有有 USB 接口嘅裝置。仲有，佢定價係比其他牌子平（某某 B 字牌頭賣二千幾）。
試完之後其實就係得一句：「 The World is FLAT！」，官方標榜嘅立體聲我 feel 唔到呀！又咁講，對音響有少少研究嘅都應該知，呢個領域從來都係一分錢一分貨，唔係話貴就一定好，不過平嘅喺音質上就一定有返多少犧牲……
售價：$1,299
查詢：Design Chicken（3596 7411）