正所謂科技改變未來，近年 AI 已成大潮流，唔知呢項大熱科技，又會點睇一個城市未來會變成點呢？近日英國諾定咸就有傳媒透過 AI，製作出該城市嘅未來圖片，不妨睇睇 AI 出嚟嘅結果係點。
來自《Nottinghamshire Live》網頁嘅 Executive Editor Sam Dimmer 一文，文中佢話科技不斷改變佢住緊嘅城市——諾定咸，有見 AI 可以做到好多嘢，所以佢就用 Bing 嘅 AI 功能，透過 Image Creator 製作出 10 年、20 年、50 年，甚至係 100 年後嘅諾定咸城市圖片，大家又估唔估到呢個城市將來會變成咩樣呢？
至於點解用 Bing 呢？文中佢就無講到，不過預測一個城市嘅未來都係個幾好玩嘅題目，現時 AI 有咁多大數據，要預計一個城市未來嘅模樣唔難，但睇完以上嘅預測圖片，唔知又有無覺得 Bing 可能係睇得太多科幻片呢？最正嘅係 1,000 年後竟然係反璞歸真，回復返千幾年前嘅古老好時光。
除了 Bing 嘅 Image Creator，現時都有好多 AI 圖片生成器，可以做到以上嘅圖片，例如 Stable Diffusion（Adobe）、Midjourney、DALL.E2（Bing 就係用佢）、DeepAI、Fotor、Canva、MyEdit 等等較為人熟悉；筆者就試過用 Midjourney 嚟製作香港 50 年後預測圖片，效果係點可睇下圖。大家亦可試吓用唔同嘅 AI 圖片生成工具，去預測吓香港未來會變成點嘅樣㗎！日後有機會再同大家介紹唔同嘅 AI 應用。
