《 PC Market電腦廣場》響 1993.12.16 創刊，直至出書嘅今日 2022.05.30 計，周刊總共出版咗 28 年 5 個月及 15 日，斷日計就係 10,393 日，對編輯部嚟講絕對係一堆唔容易嘅數字；當然，因為有讀者大大你哋嘅支持，我哋先能夠堅持至今，由 #1000 期嘅 Big Issue 出到 #1500 期嘅 Grand Issue ，響度致以衷心嘅感激！
歐洲足球聯賽、盃賽已經收咧，球員們可以放暑假抖吓先，而出版咗 #1500 期嘅《 PCM 》周刊，都係時候放個暑假，一路以嚟我哋都維持雜誌嘅出版，不過時移勢逆，周刊響時間上嘅優勢已經唔及 online ，所以趁住 #1500 期呢個大日子，我哋亦做出一個好重要決定⋯⋯大家放心，家陣我哋仲未想放棄雜誌嘅出版，只係將《 PCM 》由周刊轉為月刊形式出版啫，內容當然會同周刊有分別，但係產品測試仍然會係主力之一，由於有更充裕嘅時間，大家可以期望響《 PCM 》月刊會見到更詳盡、深入嘅測試報告，至於其他新內容，響 7.15 出版嘅全新《 PCM 》月刊入面就會見到㗎喇。
有時啲嘢真係咁啱得咁橋，呢兩年因為疫情關係，「 IT Award 」嘅投票及結果公佈被迫延後，而今年已經舉行到第 19 屆嘅「 IT Award 」，撞正 #1500 期公佈，所以最後一期以周刊形式出版嘅《 PCM 》，亦係加厚嘅特別版，當然 #1500 期嘅《 PCM 》我相信係無得炒嘅，但作為香港 I.T. 、 Tech 界嘅讀者，都值得買返本做個留念。
響轉做月刊嘅同時，我哋會將公司嘅資源轉移至 online 業務，包括網站、社交平
台、影片以及 ZCOPE ，由 6 月開始就會係另一個新挑戰，甚至會嘗試新嘅工作模式；雖然月刊要多個半月至見街，但其間編輯部係會如常運作，同事們會評測照做、網料照報，而呢篇亦會係我最後一篇嘅周刊版「編者話」，嚟緊見到嘅月刊，「編者話」 會由新嘅總編輯阿耀接手，所以各品牌、公關、代理、行家們，記得繼續撐我哋呀！🙇🏻♂️
說了再見⋯⋯約定再見⋯⋯就會再見！