每年夏季，都係 SONY 推出全新旗艦手機嘅時候，雖然家陣仲係 4 月中，SONY 仍未見有任何新品發佈預告，但近日響日本 SONY 官方網頁卻釋出一個「Xperia SPECIAL EVENT 2024」，唔知會唔會就係傳咗一排嘅旗艦新機 Xperia 1 VI 呢？
要揀日系手機（行貨）現時基本上只有 SONY，雖然 SONY 的市佔率唔算高，但其獨特嘅設計語言，一向有一班忠粉喜愛，而下一代嘅旗艦型號 Xperia 1 VI 也令人期待，不過到現時為止，就算網上有關新機嘅傳言，但官方仍未有任何關於新機消息。
響 4 月 17 號，日本嘅 SONY 突然響官方網頁，搞咗一個名為「Xperia SPECIAL EVENT 2024」嘅體驗活動，話係「SONY 帶嚟嘅技術，未體驗過嘅感動」，至於活動日期係 2024 年 5 月 17 號，地點係響東京都品川区嘅寺田倉庫 B&C HALL，時間由晚上 19:00~21:30，SONY 亦有好簡單咁介紹咗呢個活動：「為咗表達感激之情，我哋將舉辦 Xperia SPECIAL EVENT 2024。Xperia 開發者將會介紹新機嘅最新功能，您仲可以親身體驗。」
日本 SONY 突然搞個新機體驗活動，睇返過去三年 Xperia 1 系列嘅推出時間，Xperia 1 III 係響 2021 年 7 月 1 號推出，Xperia 1 IV 係響 2022 年 6 月 1 號推出，而舊年嘅 Xperia 1 V 就係響 2023 年 5 月 11 號推出，由此推斷，響 5 月 17 號或之前推出 Xperia 1 VI 嘅機會十分之大。
至於有關 Xperia 1 VI 嘅規格傳言，最令人關注嘅就係屏幕方面，傳聞新機會將現時嘅 4K 21:9 屏幕，換成只有 2K+ 嘅 19.5:9 比例，但尺寸維持 6.5” 大細，估計新機機身短咗但會寬身少少，處理器係 Snapdragon 8 Gen 3 平台，維持三鏡頭組合，全部為 48MP Exmor T for mobile 感光元件，主鏡為 1/1.4” f/1.4，超廣角鏡為 1/2.7”，長焦鏡就提供 3× 光學變焦。
睇返以往幾代 Xperia 1 嘅售價，Xperia 1 III 256GB 賣 HK$9,299，Xperia 1 IV 256GB 賣 HK$9,699 / 512GB 賣 HK$10,499， Xperia 1 V 同 IV 售價一樣，如果新機嘅屏幕作出調整嘅話，估計 Xperia 1 VI 嘅售價會更具競爭力；有興趣嘅朋友，記得留意 SONY 官方公佈新機嘅發佈詳情。
