DJI 今個暑假好忙，新機出完一部又一部， Air 3 無人機、Action 4 運動相機之後，又有新無人機即將推出，而且係有兩部新機𠻹，有一部就已經官宣咗，另一部就又係被人意外流出嘅，睇吓嚟緊 DJI 會出咩新機啦。
首先講咗部非官方宣佈嘅新機先，每逢出新機前，總會被人流出新機相片，甚至試飛片，今次主角係 Mini 4 Pro。嚟自 Quadro_News 嘅消息，近日就流出聲稱係 DJI Mini 4 Pro 嘅實機相片及試飛影片，你無睇錯呀！消息的確話係 Mini 4 Pro，睇返上一代 Mini 3 Pro 嘅正式推出日期，係響 2022 年嘅 5 月，呢個時候流出 Mini 4 Pro 嘅試飛影片，估計推出日期都不遠矣。
不過流出嘅試飛影片中，只係離遠見到有人操控部無人機，同埋係好細範圍內飛行，機身細節睇得唔清楚，就咁好難確定係咪 Mini 4 Pro，而流出嘅實機相片亦係響街上被影到，細心留意會見到前臂加返隻腳，避免機身太貼地，唔係係咪比 Mini 3 Pro 用戶投訴呢？
疑似 Mini 4 Pro 流出影片：https://twitter.com/i/status/1689248720569741312
反而另一張流出嘅手機畫面相片更值得研究，雖然只係影住個角落，但疑似係《DJI Fly》app 畫面就顯示出「DJI Mini 4 Pro」字樣，而且有個日期係顯示「2023-07-14」，即係話早於 7 月中 DJI 就已經確定咗新機型號，估計現時已進入最後測試階段，所以就開始流出相片同影片。
由於各地都有無人機條例管制，令到 249g 以下嘅無人機大受歡迎，唔知係咪見 Mini 3 Pro 銷量不錯，所以 DJI 加快呢個系列嘅新機推出，如果 Mini 4 Pro 真係會響呢兩個月內推出嘅話，Mini Pro 系列嘅推出週期似乎真係縮短咗，相信好快會有更多關於 Mini 4 Pro 嘅硬體消息流出，大家拭目以待。
講咗咁多 Mini 4 Pro 嘅消想，其實 DJI 官方確實有釋出新機嘅發佈預告，不過今次新機只限中國方面，因為新機係工業用嘅運載無人機，而發佈時間係北京時間 8 月 16 日晚上 21:00，預告中已隱約可見新機嘅外型，有興趣到時可留意官網。
