近年好多經典舊 game 都大搞週年慶，今次輪到《太空侵略者 SPACE INVADERS》，原來今年係《太空侵略者》45 週年，唔經唔覺呢個地球比佢哋侵略咗咁多年，不過佢哋話仲會繼續侵略，仲用埋 AR 技術嚟侵略，搞到我哋去到邊都要對付侵略者𠻹…
唔經唔覺，《太空侵略者》嚟到 2023 年已經有 45 年歷史，趁住呢個大日子，TAITO 顆拍 Google 推出新世代嘅《太空侵略者》遊戲《SPACE INVADERS: World Defense》，其實早於今年的 Google I/O 中已正式公佈，近日呢個手遊終於面世，遊戲係用咗 Google 最新嘅 AR 技術開發。
呢個遊戲特別之處，係換成 AR 擴增實境嘅玩法，同以往平面或立體嘅《太空侵略者》好唔同，《SPACE INVADERS: World Defense》嘅背景畫面就係玩家眼前嘅景物，就好似《Pokemon Go》咁，透過鏡頭攝取眼前景物作背景，侵略者就好似響玩家面前、頭頂咁攻擊你，將虛擬同現實合二為一。
雖然遊戲玩法一如槪往，看似簡單，但加入咗 AR 元素，要攞住及移動手機，而且發炮射擊係要㩒中畫面中嘅侵略者先得，實際上難度大增，玩起上嚟都要啲時間適應。而《SPACE INVADERS: World Defense》已經響 Play Store 及 App Store 有得下載。
日本 TAITO 除咗同 Google 合作推 AR 版遊戲外，亦響專屬網站釋出多種 45 週年嘅紀念品，紀念品同唔同單位合作，其中包括限量 100 個嘅官方認證金幣、史上最大嘅軟膠侵略者玩具、枱機款嘅貯金箱、「江戶切子」玻璃杯等等。
《太空侵略者》日文官方網頁：https://spaceinvaders.jp/
